Չփնտրենք, թե ով է խոսում, այլ տեսնենք, թե ինչ է ասում
Ամեն խոսքի մի' հավատա և մի' հետևիր ներքին քո մղումներիդ, այլ քննի'ր ամեն բան զգուշությամբ, Աստծո կամքի համաձայն: Ավա~ղ, հաճախ այնքա~ն տկար ենք. ուրիշների մասին ավելի հեշտությամբ ենք խոսում- լավ կամ վատ- և այնքա~ն շուտ ենք հավատում վատաբանող խոսքերին: Մինչդեռ, կատարյալ մարդիկ հավատք չեն ընծայում իրենց բոլոր լսածներին, որովհետև լավ են ճանաչում մարդու թեթևամտությունը և նրա` դեպի չարն ունեցած հակումը: Իմաստություն է աճապարանքով չգործելը, ինչպես նաև համառորեն չկառչելը մեր սեփական տեսակետներին: Իմաստություն է մարդկանց բոլոր խոսքերին անխտիր չհավատալը և լսածն առանց ստուգելու ուրիշներին չհաղորդելը: Խորհուրդ հարցրու խոհեմ ու խղճամիտ մարդուց. թույլ տուր, որ քեզնից ավելի կատարեալ մեկը առաջնորդի քեզ, և ոչ թե հետևես միայն անձնական գաղափարներիդ: Առաքինի կյանքը մարդուն իմաստուն է դարձնում Աստծո կամքի համաձայն, և տալիս է նրան մեծ փորձառություն: Մարդ որքան ավելի խոնարհվի և հպատակվի Աստծո կամքին, այնքան ավելի իմաստուն և խաղաղասեր կդառնա ամե'ն բանի մեջ:
